الثلاثاء، 1 أبريل 2008

صعيدى رايح جاى


السلام عليكم .... بعد الموضوع النكد اللى فات ..... موضوع العنوسة وهمومه وأيامه عاوزة ياجماعة أتكلم


فى موضوع شخصى امال انا عاملة الحزب ده لية هتقولولى هو ده حزب والدك ولا ايه ؟


بس معلش استحملونى


كلمتين واقفين في زوري ولازم يخرجوا ............


خمس عرسان يطفشوا ياجدعان .... وكلهم يمشوا بلا حس ولا خبر ... الصراحة انا مش لاقية اى تفسير

منطقى


واسأل هم الشباب عاوزين نانسى عجرم .... ماينفعشى زينات صدقى ولا خيرية احمد لازم تكون امورة وننوسة

الشباب ياجماعة بقى سطحى جدا ... والعينة بينة ..........

عاوزين واحدة روشة ودلع ايه . وأختكم مالهاش فى الدلع ولا الروشنة وبموت فى الصراحة يعنى



عاملة ذي القطر ... يعنى كله يوسع ... كله يغور من قدامى


لدرجه ان واحد من الاخوة المحترمين قاللى ... انتى حضرتك شبه واحد صعيدى صاحبى


رحت قلت له ...... أبقى سلملى عليه . وهكذا اختكم ياحضرات الاعضاء


ماذا تفعل لو كنت مكانى ...... يلا انا مش لاقية علامة الاستفهام لو حد لا قاها يجيبها ياولاد الحلال

هناك 69 تعليقًا:

أميمة كامل يقول...

ولا يهمك .ما تزوج رجل إمراة لجمالها إلا

زاده الله دناءة


ربنا يهدى شبابنا ويظفروا بذات الدين

ويعلموا فعلا ان الدين والخلق اساس

الإختيار الصحيح

رئـــــيسـة حزب الأحلام يقول...

omaima

اية ياجمييل اول تعليق يارب بس
شبابنا يفهموا كدة وبلاش يبصوا للشكل وبس ربنا يهديهم

عايش... ولكن !!!! يقول...

اول زياره
بس يا بنت الحلال انا مش عاوز اكدب عليكى
الواحد بيبقى عاوز واحده بردوا تكون مش مسترجله فيها
وانتى بتقلى صعيدى
حرام عليكى
حاولى تاخدى بالك من نفسك
تحياتى
علاء

ساعد نسرين الايمن يقول...

عزيزتي رئيسة حزب الاحلام

اولا علامة الاستفهام موجودة فقط اضظغي شيفت وظاء مع بعض هتظهر ليك

اديني جبيت ليك علامة الاستفهام اهوا

بقي العريس

والعريس موجود
اطلبي منه عنوان صاحبه اللي انتي شبهه
وروحي اتخنقي معه بدعوي انه بوظ ليكي الجوازة عشان الشبه ده
وادام هو صعيدي
يبقي هيتجوزك اكيد

أو حل تاني
انك تتعرفي علي حسام صاحبي
وحسام ده حياته عبارة عن سسلسة طويلة من البنات اللي اول ما بيعرفهم ويحبهم يتختطبوا ويتجوزا علي طول
فاكيد وشه مش هيخب معك ابدا
حكم انا مجربه علي تلاتة اعرفهم مش كان بيعيس ليهم عرسان ابدا

وعلي فكرة انتي ظالمة الشباب اوي مش كل الشباب عايز نانسي عجرم
فهناك الشباب الملتزم
اذكر ان اخا قال لي انه يريد اخت ملتزمة تشبه ليلي علوي وحافظة القران
يعني حالة نانسي مش حالة عامة



بجد ربنا يوافقك عمتا
وكل شئ قسمة ونصيب
وانا نفسي رغم انني مش شبه اي حد صعيدي او هندي
لم اتتزوج بعد

شاب نفسة يحقق حلمة يقول...

ربنا يوقفك وتلاقي اللي يستاهلك
ومتزعليش وفعلا كلة يوسع كلة يغور المهم انك انتي تبقي مقتنعة بالشخص اللي هتكملي معاة حياتك
تحياتي

khobayb يقول...

مش ذكاء أبدا إن الواحد يختار بناء على الجمال الشكلي لوحده

الإنسان بيتعود على الشكل في خلال يومين اتنين ، ومبيسألش نفسه بعدها فلان حلو شكلا أو لأ

اللي بيفرق فعلا شخصية الإنسان

لو السبب في الشكل ، فاحمدي ربنا إنهم مشيوا ، بالتأكيد مكنتيش محتاجة زوج دماغه فاضية أساسا

لكن لو السبب في الشخصية ؟ حاولي تشوفي ايه الخصلة اللي بتزعل الناس منك ، وتغيريها

ودائما يكون عندك يقين إن ده رزق ومكتوب أصلا

لا خيار لنا فيه

رزقك الله زوجا صالحا

فرنسا هانم يقول...

واحد صعيدى ؟؟؟؟؟؟؟؟؟؟
ده اكيد راجل زى القمر
برضه فى رجاله صعايده حلوين
عموما
انا حاسه انك قمر

أم أحمد يقول...

هي حصلت للصعايدة
أولاً
ياجماعة سلوي مش وحشة أبداً
ملامحها جميلة ..وبيضاء اللون ...متدينة من وهي صغيرة ومابتفوتش راكعة ... وفوق كل ده دمها خفيف
بس ... للأسف مابيتعرفش أن دمها خفيف من أول قعدة
ومشكلتها مابتاخدش علي الناس بسرعة
أنا أختها أهوه ورغم خفة دمها اللي انا عارفاها بس مدونتها بينت لي انها مخبية كتييير جواها
المهم انا بقول ليكي ولغيرك اللي العرسان مابيعمروش معهن أن اكيد بيمشوا لأن نصيبك لسة ماجاش
وأكيد الأحسنمستني للآخر
ربنا يعوض صبرك خير

الشموع البيضاء يقول...

اولا تحياتى لك ياجميل
ثانيا عاوزه اقولك ان النوعيه دى من الشباب بصراحه نفتحلهم اكبر بااااب يخرجوا منه ويروحوا يدوروا على الى زى نانسى هيفا ولما يرجعوا يعيطوا تانى مش سامعين مش شايفين..وانتى قلتى بنفسك سطحيه يعنى مفيش مسؤوليه ولا نضج..بس اكيد فى ناس محترمه وملتزمه وبتقدر وبتفهم ربنا يرزقك واحد منهم ونفرح بيكى قريب..اللهم امين

مدام كعبولة يقول...

بصي يا بنتي

اولا مسألة ان الرجالة عايزة نانسي لا مش كلهم فيه بيحب هيفا و النوعية الجديدة اللي شبهها

قانيا لو جت علي كدة و بس تعدي لأنهم في الاخر حيتقبلوا ان مستحيل نانسي او هيفاء تقبل بيهم

لكن الحقيقة و اللي شوفت ناس كتير بيفكروا فيها هم عايزين جمال آخاذ و مال و جاه و حسب و ياريت لو شقة و عربية كمان هم مش طماعين انا سمعت عن واحد في التلاتينيات من واحدة السبعينيات علشان الشقة بس..و الله يوم مسمعت قصته مان حيغم غليا نت الغيظ

بس دي ميزة علي فكرة العيب مش فيكي العيب فيهم هم

ثم آجلا ام عاجلا ان شاء الله ربنا حيرزقك باللي يفهمك

و علي فكرة الرجل المحترم هو اللي يعجب بالست الصريحة

اما اللي وقعوا من كشف الرجال فدول متبصلهمش اصلااااااااا

خايف من الحقيقة يقول...

ربنا يسترها يارب عليكي وعلينا
مش كل الشباب بيدوروا على الشكل 95% منهم بس هما اللي سطحيين
الباقي بيدور على عقل وثقافة واخلاق
وتدين قبل كل ده
بس برضه الجمال مطلوب
وعموما اختك ام احمد وصفتك
وبناء على الوصف ده
ياستي لو تصبري شويه الواد ابني عنده تسع سنين
كلها كام سنه ويتخرج
وابوه في الخليج
هه ايه رايك!!!!

عاشــــــ النقاب ـقــــة"نونو" يقول...

السلام عليكم
بصي الجمال دة نسبي ويمكن انتي شايفة في نفسك انك مش جميلة كفاية ويمكن اوي تكوني غلطانة وتكوني جميلة المظهر والنفس ومش واخدة بالك
على فكرة كمان مش الجمال بس شكل زي نانسي عجرم ولا حاجة ممكن الجمال كله يبقى في التزامك وادبك وحيائك واللي اعتقد انه بقى اليومين دول هما اهم ركن لزوجة المستقبل اللي بيبحث عنه الشاب الصح
عارفة لو شاب اول حاجة بيبحث عنها واحدة شكلها حلو هيسيبها ويبص لغيرها لما يلااقي واحدة احلى
ما تزعليش يروح 0000يجي سبع
ربنا يكرمك ياحبيبتي مستعجلة بس على ايه
دمتي بود

رئيس جمهوريه نفسى يقول...

بصى هى المشكله دى موجوده فى الكل فى ناس كتير بتدور على البنت الجميله شكلا ومش مشكله هى من جوه عامله ازاى قصدى طباعا يعنى جاهله ولا مثقفه ملتزم ولا لا كل دى اختيارات فرعيه بس اهم حاجه تكون جميله وقموره وتعالى شوفى والله اكبر قضايا طلاق وخلع بتكون بسبب القموره الى اتجوزها ويفضل يلف وراءها فى المحاكم وربنا يهدى

رئـــــيسـة حزب الأحلام يقول...

عايش ولكن
ياجماعة لازم نغير نظرتنا للمراة والا قول على الدنيا السلام
======ساعد نسرين الايمن
===================
الحل دة كان تايه عنى فين افادكم الله
=================
شاب نفسة يحقق حلمة
السلام عليكم بتعجبنى تعليقاتك اوى
===========================

رئـــــيسـة حزب الأحلام يقول...

خبيب
ياريت الناس تفهم
=========================
فرنسا هانم
الله يخليكى يافرنسا هانم
==========================
أم أحمد
كدة سيحتيلى على النت باقمر
=======================

رئـــــيسـة حزب الأحلام يقول...

الشموع السوداء
نفسى شبابنا يتخلصوا من السطحية دى
ربنا يهديهم ويصلح حالهم وحالنا
=============================
حياتي قنبلة ذرية
انا الصراحه مش عارفة اخلرة السطحية دى ايه
===================
خايف من الحقيقة
خلاص انا مستنياه
================
nonoymm
تسلمى ياحبيبتى
=================
رئيس جمهوريه نفسى
ماهى دى الضريبة

Abo 7anf يقول...

هو اكيد مش لازم تكون نانسى عجرم
ومسالع زينات صدقى ديه بلاش نتكلم فيها
بس برده متكنش قطر تدوسنى كل يوم
لازم يكون فى مرونه فى التعامل ومبجبش حد يفهم غلط


وسلام

همس الاحباب يقول...

انا معترض على الاهانة دى
بصفتى صعيدى احتج واطالب بشطب الجملة من المضبطةوالا ..
نخش فى الموضوع
هو فعلا بقينا بنبس للمظاهر ونسيب الجوهر وده سبب المشاكل والخلافات
والجمال جمال الروح ياستى والمظاهر خداعة
على اى حال ربنا يوفقك ويسعدك دائما
تحياتى ليكى خالد

محمد فوزي يقول...

انا شخصيا لما حد بيقولي انه عايز يتجوز واحده شبه نانسي او هيفا على طول بقوله ده على أساس ان انت وائل كفوري ولا كريم عبد العزيز؟ , ما تبصوا في المرايه شويه بقى !!
بس بصراحه اللي بيفرق مع الراجل (الصح) الرقه مش الشكل لأن هي دي اللي بتديله أول مؤشر عن حاجات تانيه زي الاحتواء والصبر والحنان ودي حاجات زي ما الست بتحتاجها من جوزها هو كمان بيحتاجها من مراته
فنصيحتي ليكي بلاش حكاية القطر دي ,
مع خالص امنياتي ...

only spot يقول...

سلام عليكم
هههههههههه
يا بنتى هونى عليكى دا كفايه خفة دمك دى سيبك رزقك مكتوب عند الى لا بيغفل ولا بينام ثقى انه هيبعتهولك فى الوقت المناسب
اللهم ارزق فتايتنا جميعا بالازواج الصالحه
خالص تحياتى

رئـــــيسـة حزب الأحلام يقول...

Abo 7anf
لا ماحدش فهم غلط
==========================
همس الاحباب
انا ماغلطش فى الصعايدة وماحدش يزعل
===============================
محمد فوزي
والله اجدع رد
===============================
only spot
ونعم بالله

عياش يقول...

يا ستى ولا يهمك
وبعدين دول زى ما قلتى سطحيين فالمفروض منحطهمش فى بالنا ولا نعتبرهم موجودين ولا حتى كانوا موجودين
متزعليش نفسك

*سمر* يقول...

ده اللى انا كنت عايزة اتكلم فيه من زمان ...ليه الناس بتحكم على بعضها وفقا للشكل ..خصوصا فى مسائل الجواز دى ..والموضوع ده ظاهر فى مصر بشكل كبير اوى ...

بس على فكرة ..هما الخسرانيين ..والبنادم الى هيقيمك بناءا على شكلك ميستحميستهلكيش ...انتى عايزة حد دماغة نضيفة زيك

http://wa7di-ofakker-137.blogspot.com/

عمرو (مواطن مصرى)0 يقول...

أقسم بالله العظيم بأنى مابحبش نانسى عجرم ولا أراها رمزا للأنوثة ولا أتمنى ان اتزوج اى شبيهة لها,, والله على ما أقول شهيد..
الكلام اللى فات بجد واللى أكثر جدية منه انى نفسى اتجوز واحدة تكون شخصيتها محترمة وروحها رقيقة,, ليس الا.

سنووايت يقول...

خمسة
دا علشان الحسد ولا ايه ههههههههههه
علي فكرة بقي ولا يهمك , وبعدين اللي بيدور علي الشكل هياخده لكن المشكلة انه مش هيعيش مع تابلوه يعلقه علي الحيط

الهدهد الطائر يقول...

نانسي و هيفاء و ..الخ

يشتركوا في حاجة مهمة جدًا... هم برضه غير متزوجات!!!!!

نبيلة و يسرا و الخ.. نفس الحكاية

المشكلة ان الرجل لا يستطيع الزواج الا بعد توفر الامكانيات لديه
و دي مسألة صعبة على الكثير من الشباب في الوقت الحالي
و بما ان تحقيق الامكانيات غير وارد على المدى القريب.. تكون فكرة الزواج خارج الحسابات كذلك

أما موضوع الجمال
فغالبية المتزوجات لسن بمقاييس نانسي

والواقع انه لا يوجد حل حاليا غير الصبر.. فمهما وضع الرجل مقاييس و شروط تعتبر تعجيزية بالنسبة للواقع حوله.. ساعة القدر سيعمى البصر!

...تحياتي...

احساس لسه حى يقول...

عزيزتى

ما موضوع العنوسه ده موضوع مهم ولازم نتكلم فيه اما هنتكلم عن ايه اللى الحاجات اللى بتانكد علينا

البنات تقول الشباب عاوز هيفاء ونانسى عجرم

والشباب يقول البنات عاوزين الروش والللى مقطع السمكه وذليها

صدقينى الشكل بيشد الرجل فى اول الامر لان الغريزة بتخحكم الرجل فى حكمه على المراه

بس اكيد هى بكلامها وروحها تعرف تخليه يحبها هى لذاتها وينسا جسدها

واسالى البنات ليه مش بيحبوا الواد المؤدب اللى عمره ما عك ومشا مع دى او لعب بدى

ودايمن يحبوا من له مغامرات

ليه بيحبوا اللى معاه الفلوس

والغلبان اللى طالع عينه فى اخر الصف

على العموم اكيد لو حبك حد هيحبك مهما كان شكلك

وابقى انتى بقه مضيعوش علشان

حاجه ملهاش دعوى بالزواج وعلاقه الرجل بمراته

فهمانى ولا لسه

تحياتى

سلام

LOST يقول...

اعتقد ان الشباب والبنات كمان سطحين وكلو عايز يبص من بره ولاحد فكر يفتش على اللي جواكي انتي الانسان

وياما بنات بترفض عشان مش كوووول او مش روش زي تامر حسني مثلا

طب ايه رايك اعرف وحده رفضت واحد عشان بيلبس بناطيل بكسر

طب تعالي نطبق الفاعده في الاتنين والبنات كمان تهتم بشكل الولاد اللي يتقدمولها
(اكيد البنت بتهتم بس مش بدرجة الولاد وسطحيتهم ) احنا كفايه عندنا القبول

بس عارفه ان الجمال مش مهم زي ماهو مهم تهتمي انك تكوني جميله مهما يكون شكلك...لاني بحس ان البنت اللي بتهتم بنفسها بيبقا فيها درجات عاليه من الانوثة ...

وربنا معنا في طريفة الجواز الغبيه دي اللي عامله زي معاينة البضايغ قبل ماتشتريها...فالعيب الاول والاخير هي الطريقه نفسها

LOST يقول...

ياريت لو تلقي نظرة عندي على (أدنى العشرين و أجميلة )

همس الاحباب يقول...

ههههههههه
ولا يهمك يا اختى عادى
انا عارف انك ما غلطتيش
وحتى لو غلطتى سماح برده
تقبلى تحياتى

هيثم مكارم يقول...

*لو صدق الأخ المحترم في تشبيهك بصديقه الصعيدي ، فلا تسألي عن تفسير بل اسألي عن مصير الخمسة المفقودين(اسأليني انا عن شكل الصعايدة).
*جميل جدا أن تصبح مشكلة الزواج أو أمنيته -سمها ما شئت- مدخلا للحديث عن كل المشكلات .. أحييك وأحيي كل الراغبين في المشاكل(أعني الزواج).
*استفسار بسيط : الحزب الذي ترأسينه حزب للنائمين(الأحلام=مايراه النائم) أم حزب للمفكرين(الأحلام=العقول)؟.

الزواج.....روضة الحب يقول...

أجمل حاجة فى الدنيا الصراحة أوعى تكونى أى حاجة تانية غيرك علشان أي حد ،ومش كل الشباب زى بعضيهم وأكيد فى واحد بيدور عليكى دلوقتى بس لسة مش لاقيكى ،ادعيله ربنا يقربله البعيد 0

الزواج.....روضة الحب يقول...

أستنى يا بت ،ومالهم الصاعيدة أجدع ناس ،آه أنا لو منك كنت فقعتله عينيه ،قال واحد صاحبى قال0

رئـــــيسـة حزب الأحلام يقول...

عياش
المشكلة ان دول هم المتوفرين واشكرك على الزيارة
===========================
سمر
والاقى الدماغ النضيفة دى فين
============================
عمرو (مواطن مصرى
قسم جميل شكلى هاحطه على باب الشقه
=========================
سنووايت
يلا خلى التابلوه ينفعوا

رئـــــيسـة حزب الأحلام يقول...

الهدهد الطائر
وجهة نظر جديدة
============================
احساس لسه حى
ولله ربنا يسهل وافهم
=========================
f four a
فعلا انا عندى نفس الاحساس دة بحس اننا مثل البضائع التى تعرض بطريقة غبية وانا قلت لماما مش عاوزة اشوف حد تانى الصراحة جواز الصالونات هى اللى موجود دلوقتى وربنا يعدلها

رئـــــيسـة حزب الأحلام يقول...

همس الاحباب
الصراحة انا خفت من زعل الصعايدة احنا مش بنحب نزعل حد
===============================
هيثم مكارم(الموءود)
الاثنين معا
==========================
مدونات زوجة عاشقة
مانا كنت هافقعلة عينة بس شالوه من امامى

فزلوكة يقول...

إنتى صح يا ريسة

والجمال ما طبيعى يعنى إنو هيروح
إللى بيفضل الشخصية
وإنتى باين عليكى زى السكر
استمرى فى موقفك وميهمكيش حد
وإن شاء الله ربنا يرزقك بحد كويس يقدرك

غير معرف يقول...

انا هقولك حاجة لكل مقام مقال يعنى الواحد لازم يكون كتير فى بعض يعنى مثلا معاملة حد زميلى او قريبى او اى حد ليها معاملة، من الاخر جامدة جدا والوش الخشب والجبس والجو دة لكن طبعا مع شريك المستقبل بتبقى مختلفة حبة ودة لازم، هنا بقى فى راجل وفى ست يعنى حبة انوثة وبردة مش من الاول دة طبعا بعد الجواز لكن بردة فى الاخر اسمنا بنات ونساء ومتهيلى فاكرينا الجنس اللطيف وبعدين لو سالتى اى حد يقولك اتجوز واحدة شبة نانسى لكن مش نانسى وبعدين مش يمكن يكون من حظك انهم رحلوا وماتبصيش للى فات بصى للى جاى بقى بالذمة فى قطر يببص وراة تووت تووووووووووووووووووووووت

مواطن مصرى نايم يقول...

دا مين الواحد اللى من الاخوة المحترمين
بتاع الصعايدة ده
دا راجل فاشل
و بعدين صعيدى صعيدى
بس يبقى واثق من اخلاقها و دينها
فكك من العالم اللى فى غيبوبة دى

The_Explorer يقول...

سيادة الرئيسة،

ما أدراك أن العرسان لم يعجبهم الشكل ربما يكون الأمر فقط عدم الاٍحساس بالتوافق ولا علاقة لذلك بعيب فيك أو فيهم.

الجمال بالنسبة للبعض -وأنا منهم- شرط ضرورى لكنه ليس الشرط الوحيد. فما الخطأ فى ذلك؟ ثم اٍن الجمال نسبى ولولا ذلك لما تزوج أحد.

من الوارد أن ترفضى أنت عريسا لعدم ارتياحك له حتى واٍن رآه الآخرون كاملا والأمر كذلك للعرسان أيضا.

كما أن هناك من الشباب من يبحث عن الجمال فقط فهناك من الفتيات من تبحث عن المال فقط أو الوسامة فقط. بل ومنهن من تبحث عن الذى يركن سيارته الفيرارى أمام المسجد ليصلى الفجر حاضرا كل يوم ثم يذهب ليعمل فى شركته الخاصة ويعود اٍلى "الفيللا" بعد أن يشترى لها هدية الورد اليومية ليتجها سويا اٍلى المطار لقضاء أجازة قصيرة فى سويسرا. ثم اٍنه يتذكر تواريخ أعياد الميلاد والمناسبات السعيدة لكل فرد فى عائلتها. هو رجل تهتز لصيحته الجبال لكنه على استعداد تام لتلبية كل طلباتها. فيه شدة وحنان وذكاء وغباء وطموح فى العمل مع الجلوس بجانبها فى البيت ...

أظن المشكلة الآن أن صعوبة الظروف الاقتصادية تؤخر سن الزواج، وعموما مع تقدم السن يصبح الاٍنسان أقل مرونة وأكثر تحكيما للعقل دون المشاعر وكلها أشياء تزيد من صعوبة الاختيار فى الزواج.

أخيرا، الزواج كالرزق علينا أن نسعى وعلى الله بلوغ المقاصد.

رزقك الله من خير ما عنده.

تحياتى.

بنت جامده يقول...

كل دول مدونون
لما الكل حيكتب امال مين اللى حيقرا؟

بنوته مصرية يقول...

حبيبه قلبي
مش عيب انك تكوني راجل بس في الوقت اللي يحتاج منك ده يعني واحد رخم عليكي عكسك اه في الوقت ده لازم تكوني بميت راجل

وفي نفس الوقت لازم تبقي انثي جميلة

يعني خدي بالك من طريقتك في الكلام وفكري كويس
واعرفي في النهايه انهم مش من نصيبك ونصيبك هيجيلك هيجيلك

مش كل الشباب بتفكر ترتبط بي بنت دلوعه ومايسة
فيه شباب يحبو البنت الجاده

نصيبك لسة مجاش مش تستعجلي
انا اكبر منك ومتجوزة وعندي بنوته

ده احلي سن واحلي ايام اللي انتي عيشاها دي قبل ما تتحملي مسئولية

تحياتي لكي

امل يقول...

ياريت تيجي على قد كده
المشكلة لو بيتقدم لنانسي عشان فلوسها مش عشان جمالها وخصوصا لو طلع نقبه على شونه الحل وقتها بقه ايه؟

كاميليا بهاء الدين يقول...

ههههههههه

بيتهيألى مش الشباب بس
ده تقريبا رجال كتيييير

ربنا يهدى الجميع

تحياتى

رئـــــيسـة حزب الأحلام يقول...

فزلوكة
اشكرك على زيارتك الغالية
=============================
شباب عربى
اصله قطر مركب مرايا عشان يشوف اللى ورا
===============================
مواطن مصرى نايم
تسلملى
=============================
The_Explorer
هناك تركيبة غريبه وغير مفهومه فى صناعة مشكلة العنوسة وتحياتى للجميع

رئـــــيسـة حزب الأحلام يقول...

بنت جامده
اية وجه الاعتراض كله بيفضفض
=============================
بنوته مصرية
يلا ربنا يسهل والواحد يقدر يعيش ويتاقلم مع الظروف

رئـــــيسـة حزب الأحلام يقول...

امل
يعنى عاوزين مال وجمال يلا
=================================
كاميليا
يارب اهدى جميع المسلمين واهديهم لصراطك المستقيم يارب امين

صحفية روشة يقول...

مش معنى انك مش روشة انك تقفليها وتبقى راجل
امال اية الفرق بين الولد والبنت
الواحد لما يجى يخطب عاوز يحس انه بيتقدم لانثى
لكن مش معنى كدة انك تفتحى على البحرى والا ممكن الشاب يشك فى سلوكك
موازنة صعبة
لكن كل واحد بياخد نصيبة ويمكن نصيبك لسه بيكون نفسه
وبعدين تعالى هنا
مش بعتيلى ليه جواب رسمى يقر انى انا نائبه الحزب انا مش كنت كلمتك فى الموضوع ده قبل كدة؟

DayDreaming يقول...

وايه يعني لما يطفشوا والله بركه ان جت منهم ده انتي كان حأك تبئي مبسوطه

اصلا معظم الرجاله بعد الجواز بيشوفوا مراتتهم واحد نانسي عجرم ولا عائشه الكيلاني ولا بتفرق بيفرق قبل الجواز بس

مالها القعده من غير جواز
زي الفل

مجداوية يقول...

علامات الاستفهام شحة شويه من السوق فيه علامات تعجب بالهبل تاخدى شويه ؟؟؟
بصى اللى اعرفه ان اللى ايده فى الميه مش زى اللى ايده فى النار عشان كده مش حتحفك بتعليق يغيظك او يضايقك وحاسكت وحادعيلك ان ربنا يخليك تنضمى لمالكى علامات التعجب بدلا من مالكى علامات الاستفهام
ياااااااااااااارب عن قريب ونفرح بيك وبعدين فيك

عايش... ولكن !!!! يقول...

انا كنت علقت قبل كده ع الموضوع ده
بس كنت عاوزك تزورى مدونتى
وتقرى بوست كنت عملته قديم هو شويه
بعنوان جميله ولا حلوه
اعتقد هيفض الاشتباك ده
تحياتى
علاء

محمد عبدالحي بتاع بيطري يقول...

تنكح المرأة

لجمالها
و مالها
و حسبها
و دينها

وسيدنا علي بيقول المرأة الجميلة هي التي إذا نظرت إليها سرتك

و أعتقد أن ده شيء مهم
لأن فيه حريم وشهم يقطع الخميرة مـ البيت

أما موضوع القطر ده فمسيرك يجيلك واحد أقطر منك


بس لو مزنوقة أوي
ممكن تروحي مكتب الزواج بتاع جامع العزيز بالله و تاخديلك أخ لسة طالع من المعتقل طازة
ويمكن تضرب معاكي و يكون أمير جماعة و لا سلطان السلاطين .. و يسلطنك

حرة المداد يقول...

سلام الله عليك عزيزتي:بعيدا عن المزاح وخمسة جد، سأحكي لك قصة 5و4 و3
أما قصة 5 فهم أنا و4من أعز أصدقائي كلنا ولله الحمد ملتزمات دينيا وطبيبات من نفس الدفعة. مررنا بعرسان أشكال وألوان ولكن لم نفقد أبدا ايماننا بأن الله سيرزق كلا منا بالزوج الصالح الذي يعرف لزوجته قيمتها ويحبها ويكرمها ومع التوكل على الله والدعاء واليقين رزقنا على مدار عدة سنين الواحدة تلو الأخرى بالازواج الصالحين وكانت الأخيرة هذا العام.
أما قصة 4فهي لأربع أخوات قريبات لي وأيضا ملتزمات ومروا بتجارب عرسان قاسية لكن الله أنعم عليهن و خلال عام ونصف كن قد تزوجن زيجات رائعة.
أما قصة 3 فهي عن 3 أخوات صديقات لي ملتزمات جميلات داخت أمهن السبع دوخات وحارت في امر الخطاب الذين يأتون أو يأتون ولا يعودون وحينما يعود بعضهم يكون الرفض حاسما من قبل الفتاة واستمر الامر سنوات طويلة ولكنهن لم يفقدن الثقة في الله أبدا ونصحنا البيت كله بقراءة سورة البقرة يوميا حتى تطرد الشياطين وأى حسد أو ما شابه وما شاء الله خلال عام واحد خطبت الأخوات الثلاث وتزوجن الواحدة تلو الأخرى وكانت آخرهن من أسبوعين.
يعلم الله أن هذه القصص حقيقية رأيتها بنفسي واللافت للنظر أن ال5وال4 وال3 كلهن جميلات ملتزمات مثقفات وبنات عائلات ومهما كان ما لاقته كل واحدة منهن من مواقف وتجارب مؤلمة فالعبرة أخيرا بالخواتيم. عقبالك ان شاء الله وكل البنات.
ليس المهم أن تتزوج الفتاة المهم من تتزوج.
آه على ذكر نانسي وهيفا و أخواتهما انتظروا فقط 10 سنوات ثم انظروا ماذا ستفعل بهن عمليات التجميل والنفخ.

R.O.U.R.O.U. يقول...

ana ma3 ra2y daydreaming awyy
f3lan malha 2l 23da mn 3'er gaawaz

تبارك يقول...

يظهر ان الحال من بعضه

cute يقول...

رئيسة حزب الاحلام انتى بجد دمك خفيف وزى العسل وانا حبيتك بس من طريقة كلامك فمابالك بالى يشوفك.
على فكرة الخمسة اللى جم مرة واحدة ومشوا دول هما الخاسرانين واكيد ربنا شايل لك عنده اللى احسن منهم اللى يستحقك.
بالتوفيق ان شاء الله

رئـــــيسـة حزب الأحلام يقول...

صحفية روشة
اشكرك على الزيارة الغالية

رئـــــيسـة حزب الأحلام يقول...

DayDreaming
الصراحة مافيش احسن من كدة
==================================
مجداوية
ماحدش عاجبه حاله
===========================
عايش ولكن
روحت وقرات الموضوع وجزاك الله خيرا
==================================

رئـــــيسـة حزب الأحلام يقول...

محمد عبدالحي السيد يوسف
دلوقتى انحصر الموضوع على الجمال
===========================
حرة المداد
جزاكى الله خيرا
=======================
تبارك
ازيك ياجمييل بصرة يعنى
================================
CUT
جزاك الله خيرا واشكرك على هذة الزيارة الجميلة

صيدلانيه طالعه نازله يقول...

للاسف ده حال الشباب دلوقت بيفرحوا
قوى بالجينز و المكياج و بيفتخر ان السنيوره مابتعرفش تطبخ
و بعد الجواز اما يلاقى فلوسه ضاعت على الدليفرى يبدأ يعترض و يقارن بينها و بين مامته او زوجه اخوه اللى بتعرف كل حاجه
وده بيكون بعد فوات الاوان
واللى جه بالسهل بيضيع بالسهل
اما البنات الشاطره فقاعده جنب اهاليها
او متجوزين ناس مش عارفه قيمتها
حظ العداله مايل
ههههههههههههههههه

غير معرف يقول...

ماذا تفعل لو كنت مكاني

كنت قوليله عروستك في العشه ولاطارت

العيب مش فيكي اكيد
ياستي نانسي اللي عاوزها دي تبوش
منه علي طول
متستحملش الغسيل والكلور والغليه
والحاجات اللي بتستحملها المتزوجات
عشان الحياه تكمل ونربي العيال
وكده
يروح يدور علي نانسي بتاعته في مارينا
ويبقي يحطها في حوض سمك

تــــ(حـنة)ــــر يقول...

على فكرة انا عايزة أقولك
انت صح
مش تتغيرى يعنى
وبعدين اللى خلق الخلق دى كلها قادر على انه يجعلك و احد يشبهك أو حتى على الأقل يطلب حد بشخصيتك
فالأروح جنوداً مجندة
تحياتى

تــــايه ومش تـــايه يقول...

عاملة ذي القطر ... يعنى كله يوسع ... كله يغور من قدامى
ايه ده بس بالراحه عليهم شويه دول غلابه .
ان شاء الله تلاقى اللى يقدر القطر ويقدر يقف فى وشو

الربان يقول...

تحياتي

الاعتدال في كل شيء مطلوب...و خاصة الجمال....و المطلوب في الزوجة ان تكون
مقبولة الشكل....عظيمة الجوهر...

الشاب الذي يبحث عن الجمال فقط هو بنفسه سيطلب من زوجته بعد الزواج تغيير مكياجها و طريقة ملبسها و ليس ببعيد ان يطالبها بالنقاب...

علي المرأة ايضا ان تحسن اختيار من سيصبح زوجها و ابا لابنائها...

اتمني من اولياء الامور الا يغالوا في طلباتهم للزواج.... و ان ييسروا علي من يرون انه ذو خلق و دين....

تحياتي و تقديري.

رئـــــيسـة حزب الأحلام يقول...

صيدلانيه طالعه نازله
يلا ربنا يعقلهم
================================
mady
اشكرك على التعليق
==========================
تــــــــــ(حـنة)ـــــــر
امين يارب العالمين
================================
تــــايه ومش تـــايه
وسع للقطر السريع
============================
الربان
ياريت دة يحصل بس امتى هودة المهم

صحفية روشة يقول...

انا نائب الحزب بجد؟؟؟؟؟

الطائر الحزين يقول...

ليس الامر على اطلاقة على ما أعتقد لكن


اعتقد ان المهم ان تستخدم المرأة جمالها وذكاءها و........... كل فى وقته

وعندما قيل اظفر بذات الدين

معناه ان الدين سيؤلها لكيفية الحفاظ على بيتها وكيف انها ستفلح فى ان تكون فى نظر زوجها جميلة


وليس بالضرورة ان تكون قطار طول الوقت

فللقطار محطات يقف بها


تحياتى

mostafa rayan يقول...

بصي كون انه يقولك شبه واحد صعيدي
دي طبعا قلة ادب وقلة زوق كمان
لكن بردة الراجل اي راجل بيحب الدلع
وزي مابيقول الحكيم : ان ماكنتش انت تدلعني مين هيدلعني

بنت الاسلام يقول...

سيبك من كلامهم

المهم انك تكوني واثقة انك بتعملي

الصح

وكمان شباب تافه

متوقعة منه ايه غير كلام تافه