الأربعاء، 30 أبريل 2008

مركز شباب إمبابة


السيدات والسادة أعضاء وعضوات حزب الأحلام الديموقراطى خالص مالص .


عايزة أناقشكم فى موضوع غايظنى ومخلينى مش عارفة انام واشوف مهامى فى

الحزب واقدر انام وانا مرتاحة المهم ........


فى واحدة غيظانى وكل ماشوفها خلاص ببقى عايزة .................


تخيل البنى ادمة دى عندها المقدرة ان تحب من 3 الى 5 افراد فى الشهر طبعا


اختكم تقول فى سرها ..ياجبروتك ياشيخة ايه الافترى دة. دة الواحد بقاله ربع قرن على

وجه البسيطة


ومش عارف يحب صرصار وانتى من ثلاثة لخمسة افراد ياجبايرك ياشيخة انتى فاتحة

قلبك مركز شباب امبابة


حسبى الله ونعم الوكيل


واحدة ولا بيهمها مجتمع ولا كلام ناس والناس من حوليها تفضل تغلى وهى اللى فى


دماغها هو اللى فى دماغها وعايزة البنات التانية تبقى زيها ويفتحوا مركز شباب هن

كمان

واللى يغيظك أكثر ان الشباب حوليها اكوام زى الدبان اعذورونى اخواننا الرجال


اقول فى عقل بالى كمان ...هى دى المناظر الللى بتعجب اخواننا الرجال


يلا انتم احرار وفى الاخر نشوف مين الخسران


واللى محيرنى كمان عايزة اعرف من الاخت الحلوه مين اللى عليه العين والنية بتوع

حضرتها

قعدت مرة ابصلها كدة هى البت دى بتحب مين بالضبط ياترى دة ولا الاخ دة ولا

الباشمهندس دة

بيتهيألى القلب الادمى لا يسع الالشخص واحد ودة ان جه كمان اما ان يسع خمسة فدية حاجة تحير وتمخول الدماغ وعلى رأى الاخت شادية القلب يحب مرة مايحبش مرتين

واللى يكيد أكتر ان الاخت دى فاكرة نفسها حبيبة الجماهير الصراحة حاجة تشل

الثلاثاء، 29 أبريل 2008

خير اللهم اجعلة خير


السيدات والسادة

خير اللهم اجعله خير زارتنى امبارح الست الطاهرة كونداليزا رايس فى المنام

!!!!

هتقولوا ... وايه اللى جاب الست فى كوابيسك .......... وكمان هتقليبها قعدة تفسير


أحلام ؟؟؟

امبارح وانا نايمة فى أمان الله جاتلى كونداليزا رايس وانا فى الشغل ومش عاجبها

الشغل


وعمالة تقول اية الشغل الزبالة دة وعمالة تعدى على العاملين ومش عاجبها حاجة


وكانت لابسة الطقم الكحلى البلوزة الكحلى والجيبة الكحلى كانت يعنى مكحلاها

وجت عندى


وقالت لى بعد ان كشرت عن انيابها ..... اية الشغل الزبالة دة ياأ نسة ؟؟


قمت من النوم مفزوعة واستغربت اوى من الحلم دة الست دى جاتلى فى الاحلام ازاى


دا أنا مقاطعة نشرات الاخبار عشان ماشوفشى سحنتها الكريمة طب هى جت بناء

على اية ؟؟؟


والله الست دى غريبة اوى هى مستأصدانى ولا اية ومالها بيا وايه اللى فاكرها بيا

السعادى


المهم انا أعترف انى كنت اليوم دة عندى سخونية وبرد وكحة بس مش للدرجة


الكونداليزا تزورنى فى الاحلام حرام عليكى ياشيخة انا مش ناقصة ماتروحى تشوفى حد

غيرى

السبت، 26 أبريل 2008

هلاوس رئيسة حزب الاحلام


على هامش نشاط الحزب فى إقامة الندوات والمحاضرات قررنا نحن رئاسة حزب


الاحلام الديموقراطى عمل ندوة شعرية فى مقر الحزب اليوم وستقوم رئيسة حزب


الاحلام بإلقاء قصيدة فقد ظهرت عليها أعراض شعرية فقالت تعملها ندوة شعرية هى

مالهاش نفس ولا اية .................


تظهر رئيسة حزب الاحلام على خشبة المسرح ........... تصفيق حاد امسكت

بالميكروفون وقالت



احم احم


صور كل حياتنا بقت صور


تتفرج على الصورة تفتكر أفراح وأحزان


تبص على الصورة تتوجع وقلبك يتألم


على الايام اللى عدت زى الاوهام


تبص على الصورة تفتكر ناس أخذتهم الايام


تبص على الصورة تلاقى نفسك عاوزة تبكى على الايام


ايام راحت بدون استئذان وسبتك وحدك تعد الايام


ولسة شغلاك الايام


يلا بص على الصورة


وفى صورة هتشوف نفسك سعيد ومزقطط


وهى أيام بتعدى زى نسيم بيعدى اوام


وتفضل الأيام تجيب أيام وانت لسة فى الصورة


بس الصورة بتتغير وفى الاخر تنكسر على صخرة الايام


وابقى سلملى على الايام

الخميس، 24 أبريل 2008

مرشحة حزب الاحلام الديموقراطى


مرشحة حزب الاحلام


رقم 10 رمز البلحة



الشهيرة بأسترها يارب





أخى الناخب ..أختى الناخبة


نحن معك من اجل احلام سعيدة سنقوم بتوفير حلم لكل مواطن


ونوم هادئ وحياة افضل نحن معك ضد غلاء الاسعار والحد من النوم على الارصفة


وتوفير اسرة متنقلة لكل مواطن يذهب بها أينما يشاء


نحن من أجل أحلام بلا حدود


نحن من أجلك ايها المواطن العدمان الصدمان




نبذة عن المرشحة



  1. - رئيسه لحزب الاحلام الديموقراطى لمدة شهرين

  2. عضو فعال فى الاحلام السعيدة

  3. رئيس اللجنة النقابية لنقابة النائمين على مستوى الجمهورية

  4. أمين الوحدة المركزية لجزيرة القطن المحلية

  5. تنام 48ساعة فى ال24


ماقدمته من خدمات من أجل الوطن



  1. تم افتتاح اكثر من سبعة أسرة عمومية على مستوى الجمهورية

  2. قامت بإنشاء جزر من الأحلام المفككة على مستوى الجمهورية

  3. أقامت الندوات واللقاءات حول أهمية النوم

  4. عمل دورات تدريبية للتوعية للنوم السليم ومحاصرة الكوابيس من كل ناحية



انها رئيسة حزب الأحلام الديموقراطى الشهيرة بأسترها يارب


الثلاثاء، 22 أبريل 2008

يادى الفضيحة

جائنى التاج التالى من الاخت ام أحمد وشروطه

أولا : اذكر عشرة اشياء عن نفسك


ثانيا : اختر خمس اشخاص تهدى لهم التاج


ثالثا : لا تهدى التاج لمن اهداه اليك

رابعا : عرف اللى بعتلك التاج انك نزلته عندك

اولا انا ماعرفشى نفسى غير انى باشوفها فى المرايا وهقول لاللى باشوفه فى نفسى

قبل المكياج

اولا بت كئيبة وعملة زى الصعايدة

ثانيا ساعات بتنكت لما تكون الغزالة رايقة على الاخر

ثالثا حنينة بعض الشئ

رابعا مسترجلة شويتين

خامسا عصبية بجنون

سادسا انطوائية يعنى ممكن تفضل قاعدة زى خبيتها

سابعا قليلة الكلام وياسعدها وهناها لو لقت واحدة رغاية تسيبها نفضل تلرغى وتلرد على نفسها

ثامنا مابتفهمشى الناس بسرعة ممكن تفهم بعد خراب مالطة

تاسعا بتحب التأمل فى السماء والوجوه والعلاقات المنتشرة حولها

عاشرا عندها حبة هبل على عبط

الصراحة انا البت دى ماعرفهاش اوى بس بيتهيألى هى .

أهدى هذا التاج الى كل من يريد أن يعرفنا بنفسه

السبت، 19 أبريل 2008

انتخبونى وسيبونى أنام


السيدات والسادة الاعضاء الكرام بعد ان عملنا حزب وتفرع منه جمعية وربنا يستر



مايتفرعش منه حاجات تانية ونقدر نلم الموضوع ونركز فى حاجة اصل الموضوع

اتبعتر مننا اوى المهم



ومافيش احسن من المهم .............

كنت عماله افكر هو انا لما أرشح نفسى لعضوية مجلس الشعب أختار رمز


أيه ...............

رمز الجمل ولا المسدس ولا الجمل ولا العنب ولا البلح ولا الفيل

ولا النخلة


الصراحة أحترت والموضوع مش ناقص توهان .............


بس انا لازم أرشح نفسى لعضوية مجلس الشعب عشان يبقى لحزبنا صوت فى هذا

المجلس الموقر


ونقدر نوصل صوتنا للمسئولين وكمان دة بينى وبينكم أتمتع بالحصانة البرطمانية هو

أنا ماليش نفس


ولا اية ................

حد عنده اعتراض ؟

ومن موقعى هذا أتوجة الى السادة الاعضاء بالتكرم والتوجة الى صناديق الاقتراع



وانتخابى واعدكم بصرف اتنين كيلو كباب وكفتة لكل من ضحى وخرج من بيته


واعطانى صوتة





تنتخبوا مين رئيسة حزب الاحلام

انتخبوا من يمثلكم بلحة يابلحة انتخبوا رمز البلحة


انتخبونى وسيبونى أنام شوية أصل النوم ناقح عليا واو واوا لمؤاخذة بتاوب


روحوا انتخبونى وأوعوا تناموا يلا تصبحوا على خير


انتخبونى وسيبونى أنام

الثلاثاء، 15 أبريل 2008

رحلة البحث عن االأهداف


عندما تجد هدف لحياتك تعيش من أجله وتظل تعيش لأكمال هذا الهدف وجعله فى


احسن صورة


عندما تجد هذا الهدف ويكون على مرمى بصرك تنظر اليه فى حنو تريد ان تصل اليه


تظل تجرى وتجرى لتصل الى هدف فى الحياه .......... وياويلتاه أن اصبح الهدف

سرابا ليس له معنى .......ولكنك تظل تجرى دون هدف .


نفسى ألاقى هدف أصبو اليه فى حياتى هدف قد يفيدنى ويفيد من حولى


ماذا تجيب لو سألك أحدهم ما هدفك فى الحياة ؟


قد تجيب هدفى ان أصل للسعادة أو قد تقول هدفى الأستقرار أو قد تقول هدفى أن اجد

الحب الحقيقى


أوقد تقول هدفى أن أصبح مفيدا لمن حولى ولنفسى


وهناك من يقول هدفى هو أرضاء المولى عز وجل وهذا أكيد سوف يحقق بقية

الأهداف لمن يفهم


وليتنا نفهم


نظل طول عمرنا نبحث عن السعادة فلا نجدها فى المال وأشياء أخرى قد نتخيل أنها

تجلب السعادة


وقد نظل نبحث عن عن الحب الحقيقي فلا نجده فقد اصبح هدفا صعب المنال لما


نعايشه من جفاف القلوب والعقول والنفوس


معلش افكارى بسيطة وعلى قدى .......................

السبت، 12 أبريل 2008

مدارسنا اليوم


السيدات والسادة أعضاء حزب الاحلام الديموقراطى .... تحية طيبة وبعد
وبعدأن ناقشنا مشكلة العنوسة وقعدنا نعيد ونزيد فيها لحد مازهقت وزهقتكم معايا
المهم .............
وأ نا فى طريقى للشغل الصبح ألاقيلك كام ولد بيغنو اغنية حلوة أوى بيقول مطلع الاغنية

فى بيبى صغير بيلعب فى التراب

ماما لبسته الجزمة والشراب

المُعلم قاله اكتب العربى

كتبلوا الحساب
ضربنى بالعصاية

ضربته بالكتاب ودانى للمديرة وديته للوزير

سقطنى فى الشهادة سقطه من الشباك

هى دى الاغنيه إللى سمعتها ...مش بذمتكم حلوة ؟
بس ياترى الاغنية دى بتقول حاجة ؟
وبتبين
الوضع الحالى فى مدارسنا ولا أنا بيتهيألى ؟

الاثنين، 7 أبريل 2008

الحقوا الخناقة ياجدعان


السيدات والسادة اعضاء حزب الاحلام الديموقراطى بعد الشاى والقهوة والحاجة


الساقعة

والسندويتشات طبعا هتقولوا هو احنا شوفنا منك حاجة داأنت قعدتك ناشفة اوى وكلها

مشاكل وحكاوى


مقندلة المهم وانا قاعدة افكر كالعادة اصل انا علطول عمالة افكر مش عارفة افصل


لدرجة انى نفسى مرة أقف عن التفكير وارتاح وريح البشرية من أفكارى الغبية


المهم النهاردة الافكار عمالة تضرب بعضها فى نافوخى وانا عمالة احوش الخناقة ياه


دى خناقة جامدة اوى ياجماعة صلوا على النبى وحدوا الله ودول ابدا شغالين ضرب

ونافوخى مش ناقص دربكة


فكرة ضربت فكرة وانا محتاسة فى النصف يادى الخيبه يلا يابت انتى وهية اتلموا شوية


عايزة اكتب حاجة ولا اقفلكم البلوجر دة راحوا زغرولى زغرة سمعة واحد بيقول هما مين ............

افكارى ياعم يلا هدوء ............

سمعة واحد تانى بيقول هى الريسة اتكهربت ياجدعان


ادعولى ياجماعة أن أفكارى تتصالح مع بعضها ويستهدوا كدة ويوصلوا لبر الأمان يلا

وربنا يهدى

الثلاثاء، 1 أبريل 2008

صعيدى رايح جاى


السلام عليكم .... بعد الموضوع النكد اللى فات ..... موضوع العنوسة وهمومه وأيامه عاوزة ياجماعة أتكلم


فى موضوع شخصى امال انا عاملة الحزب ده لية هتقولولى هو ده حزب والدك ولا ايه ؟


بس معلش استحملونى


كلمتين واقفين في زوري ولازم يخرجوا ............


خمس عرسان يطفشوا ياجدعان .... وكلهم يمشوا بلا حس ولا خبر ... الصراحة انا مش لاقية اى تفسير

منطقى


واسأل هم الشباب عاوزين نانسى عجرم .... ماينفعشى زينات صدقى ولا خيرية احمد لازم تكون امورة وننوسة

الشباب ياجماعة بقى سطحى جدا ... والعينة بينة ..........

عاوزين واحدة روشة ودلع ايه . وأختكم مالهاش فى الدلع ولا الروشنة وبموت فى الصراحة يعنى



عاملة ذي القطر ... يعنى كله يوسع ... كله يغور من قدامى


لدرجه ان واحد من الاخوة المحترمين قاللى ... انتى حضرتك شبه واحد صعيدى صاحبى


رحت قلت له ...... أبقى سلملى عليه . وهكذا اختكم ياحضرات الاعضاء


ماذا تفعل لو كنت مكانى ...... يلا انا مش لاقية علامة الاستفهام لو حد لا قاها يجيبها ياولاد الحلال