الجمعة، 28 مارس، 2008

المرأة المنتظرة


اعضاء الحزب الموقر



اليوم سنناقش قضية تهمنى وتهم فتيات مصر اللاتى يتظرن قطار الزواج الذى اصبح من المستحيلات



فى عصر تسود فيه الماديات والفساد بكل انواعه ... أخلاقى ... إجتماعى .... إقتصادى



وترك ورائه فتيات منتظرات متألمات لا أحد يعلم مابداخلهمن من مشاعر الألم والوحدة



انهن منتظرات ليس شئ آخر
قررنا نحن على هامش جدول أعمال الحزب ان ننشئ لهن


جمعية المنتظرات ....تقوم هذة الجمعية بتقديم المساندة لهن والاستفادة من من فراغهن العاطفى



لماذا تظل المرأة تقاسى الأمرين للحصول على الزوج المنتظر
لماذا نحكم على المرأة الغير متزوجة بالدفن ؟
إنى لا أدعوا للفجور ولكنىأدعو لإنشاء جمعية لهن تناقش قضايهن و إدماجهن فى

الأنشطة الخيرية


ويجدون من يتكلمون معه ويشكون له همومهن وإخراج الفتيات من عنق الزجاجة


يعنى إللى ماتجوزتش تروح تشوفلها موتة


ياجماعة عاوزين وقفة مع هذة المرأة وعدم تجاهلها وإنشاء جمعية تختص لحل مشاكل المرأة

المنتظرة

يابنات مصر تجمعن .. تشجعن ... قفن بجانب أنفسكن


إننا نملك بركان من المشاعر والاحاسيس إن أستغلت ستصنع المعجزات لهذا الوطن


ولا تنسوا إننا ثمرة الفساد الاجتماعى والاخلاقى والفضائيات والفيديو كليب


وثمرة ليس لها اى ذنب نحن ثمرة تحتاج الى عناية نحن ثمرة تحتاج الى توجية نفسى وإجتماعى


لمواجهة المجتمع الظالم
نحن ثمرة تحتاج الى معجزة

الاثنين، 24 مارس، 2008

فـــــاصــــــل إعلانى .... ونعووووود


حزب الأحلام الديموقراطى




ديموقراطية - نوم-سياسة- عراقة -صدارة - كل إللى نفسك فيه عندنا هتلاقيه

حزب الأحلام الديموقراطى



حزب لن تجد له مثيل ,...حزب يحل المشاكل بلا أى خسائر


حزب الأحلام الديموقراطى



به كل المقومات الحزبية التى لا يعلمها أحد إلا الله



حزب الأحلام الديموقراطى

أحلم وأتهنى ونام وأتغطى كويس عشان الكوابيس



حزب الأحلام الديموقراطى

رئيسته نائمه وبتاخد تعسيلة بين النوم



رئيسة حزب الاحلام امرأة فوق العادة إنها دائما وراء المشاكل تحلها وهى نائمة بكل ضمير



حزب الأحلام الديمقراطى



أعضائه ينامون .... يحلمون ويأكلون رز بلبن مع الملايكة ... وعندهم مقدرة جباررة لحل كل المشاكل المستعصية



وشعارنا ناس كتير نايمة على الارض



حزب الاحلام الديموقراطى



يتمتع بالشفافية يعنى احنا حاطين إزاز فاميه شفاف يخلى إللى برة يشوف إللى جوه



والصلاه على الزين ...والصلاه على الزين ...هات لنا منه باكو واتنين



بوووووووووووووووووووم



حزب الأحلام الديموقراطى

معانا هاتقدر تغمض عينيك

الجمعة، 21 مارس، 2008

العبــــــــاســــــــيــــــــــــــة للجميـــــــــــع


فى ظل المحسوبية والناس اللى هية نرجو تطوير مستشفى العباسية



أعضاء الحزب الكرام وعضواتة الجميلات سأعرض عليكم موضوع غاية في الأهمية

هذا الموضوع سيُناقش على هامش المشكلات التي طُرحت في جدول أعمال الحزب



وهو............تحويل اسم مستشفى العباسية الى مستشفى


المدينة الفاضلة
نعم احلم بتغيير هذا الاسم ، وأحلم بأن يولي السادة المسئولين الأهتمام بهذا الصرح العظيم الذى اصبح يخدم




ثلاث تربع هذا الشعب العظيم فى ظل الضغوط النفسية والعصبية والمحسوبيه وضياع الهوية واللاشئ




فاصبح المواطن المصرى يملك ربع فقط غير ضارب وممكن يلسع فى اى لحظة




لذلك أدعوا السادة المسئولين للأهتمام بهذا المكان وتنمية الاستثمارات به فهو المستقبل

والله ولي التوفيق


وشكرا

الخميس، 20 مارس، 2008

التدخين نقمة


التدخين ده بداية الإدمان


التدخين نقمة بكل معانى الكلمة


بلاش تدخن وتخسر صحتك ونفسك


بلاش تكون عبد لسيجارتك


التدخين بيجيب بلاوى كتير إحنا مش قدها


عاوز تخسر صحتك دخن يلا وسيب السيجارة تقوم بالواجب


فيها ملايين المواد المسرطنة ويخرب بيت اللى ابتدعها


دول ناس اكيد معندهومشى ضمير


عاوز تدخن انت حر بس لما تخسر صحتك


وتخسر صحة الناس الللى حواليك انت اكيد مش حر


دا أنت كمان بتضر إللى حواليك ياأخى كفاية ضرر وضرار


وبلاش تدخن ده التدخين نقمة بكل معانى الكلمة


بحلم بعالم بلا تدخين ولا سجاير


وياريت نعمل توعية ضد التدخين
وبصوا بقي عشان نبقي حلوين مع بعض من أولها
التدخين ممنوع داخل مقر الحزب
عشان بتخنق من دخان السجاير وأنا مش ناقصة خنقة
وربنا مايجيب خنقة

الاثنين، 17 مارس، 2008

شعارنا ناس كتير نايمة على الارض


الحزب الموقر .....الأعضاء الأجلاء....... بعد الإستفتاء الحر النظيف وبعد اقتراحاتكم العديد ة ....وإللى الواحد أتحير فيها الصراحة




تم اختيار ناس كتير نايمة على الارض عشان هم مكسلين يروحو الشغل ويناموا على المكاتب فلاقوا افضل وسيلة
انهم يناموا كلٍ فى مكانه ....
.أسمع تصفيق حاد .....وألا أنا بيتهيألى


سيبك من شعار الحزب وأدخل أوام على جدول الأعمال......... ياترى اية جدول اعمال الحزب؟؟؟؟؟؟؟؟

اولا ....البطالة ......كيفية حل مشكلة البطالة بدون خسائر في الأرواح


ثانيا ....رغيف العيش ..ليه مايوصلشى دليفرى لكل بيت ونعمل مندوبين توصيل للمنازل وبكدة هنحل معاها مشكلة

البطالة

ثالثا ....الزبالة ...ليه مانعملشى زى العالم المتقدم والزبالة تروح لمثواها الاخير تحت الارض اوتوماتيك



رابعا ....الزواج .......العمل على توفير زوج لكل مواطنة ، وزوجة لكل مواطن وتوفروا عليهم مشقة اللف والدوران


خامسا .......الاسعار ...... دى بقي أم المشكلات ، الصراحة انا مش عارفة احلها اصل انا ماليش فى الحساب

وأخيرا ...وليس آخراً .... الحزب فى انتظار اقتراحاتكم لحل مشاكلنا المعضلة وأوعوا تناموا فى السكة

وربنا يستر

الجمعة، 14 مارس، 2008

استفتاء على اختيار شعار للحزب


أخواني أخواتي

اعضاء الحزب الموقر

اليوم سنناقش موضوع يهم الحزب ... وبناء على رغبه الاعضاء الاجلاء

اللى شاغلهم شعار الحزب ... زى ماأتعودنا ان كل حزب ليه شعار ياترى هيكون شعارنا ايه.؟؟؟؟

واحد نايم على السرير ، ولا واحد نايم على المكتب ، ولا زى الاخت ماقالت نقطه بيضة فى بحر الفساد الاسود

ولا ناس كتير نايمة وعمالة تحلم ... الواحد محتار انا رأيى نعمل استفتاء بس مش عاوزين تذوير

وعايزين نبعد عن الشعارات الرنانه .... اللى لا بتودى ولا بتجيب انتم اكيد عارفينها وشربتوا منها كتير

لان حزبنا نايم على روحة مش هيستحمل شعار من شعارات اليومين دول

تنبيه هام ممنوع التذوير فى الاستفتاء

الثلاثاء، 11 مارس، 2008

إفيشات الاحزاب


فيه ناس مش عاجبها الهدف الخامس ... انتم عايزين تفضلوا تحلمو علي طول ولا ايه


؟؟؟ ماهو لازم بعد مانحلم نفكر فى تحقيق أحلامنا وإلا ناخد قرص منوم عشان نفضل


نايمين ونحلم ونحلم ونحلم .......


وفى الآخر نلاقى نفسنا فى السرايا مع باشاوات الاحلام


الحزب بتاعنا هو الحزب الوحيد فى مصر والعالم العربي المعترف انه حزب الأحلام


وهذا بلا فخر ... كل الاحزاب التانية عامله نفسها انهم مصحصحين وهم فى الحقيقة


اسماء على ورق وعايشين فى الاوهام


نفسى الاقى حزب فعال ويساعد الناس ويتفاعل معهم لكن الواحد الصراحة مابيسمعشى


غير أسامى ... حتى أساميهم ماتشدش الواحد يعنى عايزين اسامى تشد الواحد كه ذى


إفيشات الأفلام يلا خلينا فى حالنا

الأحد، 9 مارس، 2008

أهـــــــــــــــــــداف حــــــــــــزب الأحلام




  • عدت من العمل وأشعر بالتعب الشديد وقلت أقعد أخطط للحزب ...
  • حزب الأحلام


أصل أهم حاجة لعمل اى شىء هو التخطيط .. ثم التخطيط .. ثم تحديد الأهداف



  • وأحنا قولنا أول هدف هو توفير سرير متحرك لكل مواطن


وتانى هدف أن تكون أحلامنا بلا حدود وبلاش مقوله أحلم على قدك دى
.. بلاش قيود

حتى فى الأحلام هتقيدونا .. أتقوا ربنا ... أعملوا حاجة بضمير بقى عايزين شوية


ضمير

0000

أما الهدف الثالث أن تكون احلامنا فى الخير ، وبلاش الشر يطلع
والأحلام الشرانية بلاش


منها أرجوكم الواحد مش عايز يصحى من النوم يلاقى نفسه فى السجن ..
يلا أسترها


يارب


الهدف الرابع إن أحلامنا تكون مشتركة وياريت توارد الأفكار
...
هيعمل شغل جميل اوى


الهدف الخامس أول مانصحى من الأحلام ياريت نحققها000000000

السبت، 8 مارس، 2008

الجو ربيع وقفلى على كل المواضيع


قفل ..... قفل


حبة تفاؤل عشان الناس ماتقلشى انى مكتئبة .....

........

الواحد مش جايله نوم ومصهلل ومش عارف ينام


رئيسة حزب الاحلام مش عارفة تنام والواحد عنده شغل بكرة


المهم فيه أفكار فى دماغى وعايزة تخرج ، و بدل ماأكتب فى مذكراتى قبل ماأنام قلت


أكتب فى المدونة بتاعتى أى كلام .... أمال انا عاملاها
ليه ؟؟؟


عشان افضفض قبل ماأنام واغرق فى الاحلام


ماهى دى شغلانه الحزب بتاعنا تنام وتغرق فى الاحلام


اصل احنا ناس شايفة شغلها بضمير بنام بضمير


من الآخر ... عايزة احط اهداف واضحة للحزب


عايزين اقتراحات لوضع أهداف للحزب
ولا ننسى سرير متحرك لكل مواطن عشان يكون


معاه فى كل مكان عشان يخدم اهداف الحزب وينام ويحلم


آووووووووووم .... يااالا أصل انا باتاوب


وتصبحوا على خير ولا تنسوا ان تحلموا احلام سعيدة

حزب الاحلام


هاأعمل حزب جديد أسميه حزب الأحلام وكل اعضاء الحزب يناموا ويحلموا احلام سعيدة


احلام سعيدة للبلد والشعب الغلبان اللى هيشحتوا عليه قريب.......

.

واول الاحلام رغيف العيش .... وثانى الاحلام توظيف الشباب وتوفير فرص العمل لهم


عشان يعرفوا يتـأهلوا ونطلع من مشكلة العنوسة اللى استشرت فى البلد والاسعار تثبت


شويتين وبلاش كل يوم الاسعار ولا كل ساعة تزيد الضعف


حرام كفاية الناس المفروض تعمل ايه ؟؟؟؟؟؟؟؟؟؟يالا ربنا يستر......

......

والبهوات الوزرا اللى قاعدين على الكراسى يصحصحوا مع الشعب ويتابعوا مشاكلة


وآهاته


ده بيتهيألى شغلتهم ولا ليهم شغلة تانية بعد الضهر ياله ماحدش يعرف ظروف حد

الجمعة، 7 مارس، 2008

طوابير في كل حتة


ايه رايكم فى موضوع الحزب ده .؟؟؟ نعمل حزب ونحل فيه مشاكلنا ...
بجد مش تهريج ...
نفسى حد يسمعنا مش مديها طناش ذى خالتكم اللى انتم عارفينها
نفسى الاقى الفانوس السحرى ويطلع منه الجنى
ويقول شبيك لبيك عبدك وبين ايديك .......
.... نفسى حد مظبوط فى البلد يقولى نفسك فى ايه اقوم أرد عليه ..........كمانانا .... بس ده حلم .... ولا بلاش نحلم .... ده ساعات الواحد بيحس انهم منعوا الاحلام كمان ..
... ربنا يستر.



اصل كل حاجة فى البلد عمالة تخلص وكل حاجة بقت بالطوابير .... العيش والعمل والزواج وكل حاجة اقف فى الطابور لحد ماييجي عليك الدور ... امتى ربنا يتوب علينا
ياااااااااااالا ربنا يسترها



وتلاقى الف من يزاحمك فى الطابور ويزقك .... حتى الشغل بقى عامل زى طابور العيش حتى لوكانت

الشغلانة اى كلام تلاقى الف من يزاحمك ويقرفك فى عشتك .... هذه هى الدنيا ام هذه هى مصر ؟؟؟؟

من انا ؟


انا فتاة عندى 26 عاما واعيش مشكلة فتيات القرن الحالى وارغب فى تحويل هذة المشكلة للا شىء لان الرضا بالمقسوم شىء جميل ولا ادعى بالرضا الكامل عن حياتى ففى بعض الاوقات اشعر اننى ينقصنى كل شىء وفى اوقات اخرى اشعر بالرضا التام عن حياتى يمكن لاننى متقلبة بعض الشىء ويمكن كمان لانى زى بقيت البشر عايزة كل حاجة اصل الانسان طماع يفضل يقول انا عاوز انا عاوز ومافيش حاجة تملى عينة

لماذا أكتب


للتعبير عن مشكلة الاف الفتيات اللاتى يواجهن نفس المشكلة المستعصية التى ليس لها حل سوى التضرع الى الله والبحث عن الاسباب