الاثنين، 17 مارس 2008

شعارنا ناس كتير نايمة على الارض


الحزب الموقر .....الأعضاء الأجلاء....... بعد الإستفتاء الحر النظيف وبعد اقتراحاتكم العديد ة ....وإللى الواحد أتحير فيها الصراحة




تم اختيار ناس كتير نايمة على الارض عشان هم مكسلين يروحو الشغل ويناموا على المكاتب فلاقوا افضل وسيلة
انهم يناموا كلٍ فى مكانه ....
.أسمع تصفيق حاد .....وألا أنا بيتهيألى


سيبك من شعار الحزب وأدخل أوام على جدول الأعمال......... ياترى اية جدول اعمال الحزب؟؟؟؟؟؟؟؟

اولا ....البطالة ......كيفية حل مشكلة البطالة بدون خسائر في الأرواح


ثانيا ....رغيف العيش ..ليه مايوصلشى دليفرى لكل بيت ونعمل مندوبين توصيل للمنازل وبكدة هنحل معاها مشكلة

البطالة

ثالثا ....الزبالة ...ليه مانعملشى زى العالم المتقدم والزبالة تروح لمثواها الاخير تحت الارض اوتوماتيك



رابعا ....الزواج .......العمل على توفير زوج لكل مواطنة ، وزوجة لكل مواطن وتوفروا عليهم مشقة اللف والدوران


خامسا .......الاسعار ...... دى بقي أم المشكلات ، الصراحة انا مش عارفة احلها اصل انا ماليش فى الحساب

وأخيرا ...وليس آخراً .... الحزب فى انتظار اقتراحاتكم لحل مشاكلنا المعضلة وأوعوا تناموا فى السكة

وربنا يستر

هناك 41 تعليقًا:

مدحت محمد يقول...

طيب اول تعليق بالصلاة على النبى

مدحت محمد يقول...

اول مرة اخش مدونتك طبعا لازم كنت اعرف شعار الحزب وكل حاجة عن الحزب
حزب الاوهام
وبما انى بحب النوم والكسل
فانا بعلن انضمامى للحزب
حزب الاحلام
تحياتى

فرنسا هانم يقول...

انا ارحب واوفق على الشعار ده
وده شعار جميل جدا
لكن
احنا هنبدء نحل المشاكل من دلوقتى ؟
وبعدين
اولا وثانيا وثالثا ورابعا
لالالالالالالالالا
احنا ناخدها واحده واحده
ناخد اولا
ونااااااااااااااااام شويه
ونرجع نقراء اولا
وناااااااااااااااااام شويه
ونرجع نفكر تانى فى اولا
ونااااااااااااااااام شويه
وبعدين نفكر فى ثانيا

somaa يقول...

هههههههههه فرنسا وانتى زى السكر....بما انى خبيره فى النوم فالنوم ليه سبع فوايد اولها وثانيها وثالثها....حكملك بكره ان شاء الله تصبحى على خير بقى
تحياتى ليكى سومه_87

somaa يقول...

http://magnonaa.blogspot.com/2008/03/blog-post_17.html
دا اهداء منى ليكى يا ريت تقريه....
تحياتى ليكى سومه_87

أم أحمد يقول...

بعد إذنك ياسلوي عملت موضوع عنك في مدونتي ابقي زوريني وعلقي عندي كمان عشان زواري يوصلولك

حياتي قنبلة ذرية يقول...

بصوا تصبحوا علي خير شوية

انا عن نفسي عطيت حل عملي لمشكلة العيش

اما عن الباقي سبوني انام شوية و تصحي اكملكم

arsenalwy يقول...

هو الحزب الرايق دة فين بالظبط

على الارض
ولا.............



شكرا

رئـــــيسـة حزب الأحلام يقول...

محمد مدحت اشكرك على التعليق وانت اول حد يعلق عندى وانت على العين والراس

رئـــــيسـة حزب الأحلام يقول...

فرنسا هانم كويس انك موافقة على الشعار دة لان لو ماعجبكيش كنت هزعل اوى

رئـــــيسـة حزب الأحلام يقول...

somaa اشكرك على الجوز تعليق وانا قلت اوعو تناموا فى السكة

رئـــــيسـة حزب الأحلام يقول...

soma
اية الاهداء العسل دة ياخواتى

رئـــــيسـة حزب الأحلام يقول...

ام احمد ميرسى على وقفتك معايا

goodman يقول...

دا حزب الاحلام ولا اللى بالى بالك

بنوته مصرية يقول...

ههههههههههه

يا سلام لو الحزب ده فعلا موجود

الحياه هتبقي بمبي بمبي

تحياتي

رودي

رئـــــيسـة حزب الأحلام يقول...

السلام عليكم اشكرك على هذة الزيارة الغالية واتمنى لك التوفيق

مدونات زوجة عاشقة يقول...

اليكم الحل /اولا :البطالة /الستات تعد فى بيوتها0ثانيا:العيش/عايزة تأمنى بتوع توصيل الطلبات للمنازل(ماباحبش أتكلم إنجليزى وسط لعربى)على العيش ،كله إلا العيش0

مدونات زوجة عاشقة يقول...

ثالثا:الزبالة /أخص عليييييكى والحكومة تتحرم من الكام مليون اللى بتاخدهم على الكهربا ،لأ بجد ماكيش حق0 رابعا:الجواز/هى بس الستات تعد فى البيت وتريح نفسها وانت تلاقى كل الشباب أشتغل وعرف يتجوز(وقرن فى بيوتكن)والعيال يتربوا كويس والحياه تحلو0 خامسا:الأسعار/ندعى دعاء جماعى على الظالم والمفترى والشعب كله يشترك معاناونوزع إعلانات بكده0

بحبها يقول...

المشاركة بحلول هى اهم ما يمكن تقديمه لهذا الحزب الموقر لذلك اقترح ان نعمل على احياء مشروع حول بيتك لمخبز وحول بيتك لعشة طيور وهو نساعد الحكومة بتعتنافى الايام اللى مايعلم بيها الا ربنا

همس الحياه يقول...

انا عندى حل للاسعار نبطل ناكل ........ههههههههه
موضوع جميل

حياتي قنبلة ذرية يقول...

سيادة الرئيسة الموقرة

ناخد كدة نقطة نقطة

اولا ....البطالة ......كيفية حل مشكلة البطالة بدون خسائر في الأرواح

مشكلة البطالة دي مش مشكلة سهلة بس برده اسمحيلي اقولك ان الشباب جزء من المشكلة ....مستني قرار القوي العاملة اللي بتعين المحامي في الاصلاح الزراعي و بمرت ميسمحلوش حتي بفتات الخبر مش شراء رغيف علي بعضه

الحل حضرتك يكمن في غزو الصحراء

مهو من الاخر كدة
من لا يملك قوته لا يملك كرامته

مشكلة العيش وارتفاع الاسعار و غلو كل حاجة علينل و تنكيد عيشتنا و عيشة اللي حوالينا اننا مبنمكلش قوت يومنا..القمح معونة او استيراد و الانتاج طفيف حتي لما بنحب نزرع حاجة بنستورد البذور من الخارج

يبقي الحل اننا نعمل اكتفاء ذاتي
ازاي؟
بأننا نستصلح الصحراء

محدش يقولي ناس حاولوا و فشلوا

حقولكم عارفة بس ده لأن استصلاح الصحراء بيتكلف فلوس و معدات كتير و كمان بيحتاج صبر هائل و علشان تصتصلح ارض و تؤتي قمارها مش عايز اقل من 5 سنين

طيب نجيب الفلوس و المعدات دي منين

بالمساهمات الفردية او بالقروض الحسنة من رجال الاعمال و اللي المفروض طبعا يساهموا معانا

برده محدش يقولي انهي رجال اعمال.. اللي بيهربوا برا البلد؟؟

حقولكم ارجوكم بصوا للنصف الملئ من الكوب
ان كان فيه ناس بتسرق و تهرب في برده ناس مكافحة و محترمة و بتوجه فلوسها للخير و طبعا مفيش خير اكتر من انك تساهم في نهضة البلد لأنك مش حتحل مشكلة واحدة انت حتحل اكتر من مشكلة معقدة

اولا: البطالة....الارض حتي مع المعدات الزراعية محتاجة ايد عاملة كتير
ثانيا: العيش... لأن الارض لما تؤتي ثمارها حنزرع فيها قمح و القمح يعني العيش
- كمان لما الشباب بتجه للصحراء حيخف طابور العيش يعني بدل ما يبقي 4 ساعات حيبقي ساعتين او ساعة واحدة
-ارتفاع الاسعار : مهو لما نعتمد علي نفسنا و نبطل استيراد من برة الاسعار حتقل او مستوي دخل الفرد نفسه حيزيد بسبب اتجاهه للعمل الحر فيقدر علي الاسعار

رابعا و ده الاهم

الجرييييييييييمة اللي حتختفي
خامسا و ده الاكثر ... اهمية..

الجواز الشباب ده كله مش حيقدر يكمل لوحده في الصحرا لأن كل اللي حشفوه خلق مبهدلة و اصفر في اصفر لحد ميظهر الاخضر فحيتاج واحدة يجيبها ينكد عليها عيشتها يبقي البنات حتتجوز و لو ان علي رأي المثل اللي بيقول( متحسبوش يا بنات ان الجواز راحة) بس يلا طالما دي رغبتكم تحملوا المسؤلية للاخر
و طيعا الشاب حيبقي عنده بيت في الصحرا يعني مشكلة الشقة اتحلت و الاهالي ميغالوش في المهور ووووووووو


تصبحوا علي خير
خخخخخخخخخخخخخخخخ

غربة وطن يقول...

أنت
يا سارقة ياء النداء من حروفي
لماذا أنتِ مرتبكة ؟
نعم أعنيك أنت
ادعوك للإنضمام للفكرة
فانتِ وحدك .. تلك التي لم تأت
هذا طريق لم يكن يعرفه احد
و لا يعرف احد
طريق لم تعرفه اقدام المارة
و لم تدنسه من قبل عجلات سيارة فارهة وقودها من عرقك و دمي
تعالي معنا و املئي الدنيا بالضجيج
نظرة على اسرار اون لاين لن تضيرك
و مشاركتك تأكدي انها مصدر سعادة لنا
http://asraronline.com/vb/

المفقوعة مرارتها يقول...

طب أفرضي حلينا كل المشكلات
هاتبقي الدنيا أسمها دنيا أذاي


الدنيا لازماً ولابد تكون متحبشة بشوية مشاكل تديها طعم


وبعدين هي دي مشاكل ...لو نلبس مع بعض نظارتنا الوردية ونشوف الدنيا البمبي اللي عايشين فيها
البطالة ... دي أجاااااااازة
يعني الحق عليها الحكومة أللي مش عاوزة شبابها يتعب ومقعداهم علي قهاوي ترد الروح

رغيف العيش ... أحسن أنه عليه طوابير والناس مش لاقياه ده حتي مليان مسامير مصدية بتوجع البطن
طب أنا راضية زمتك عمرك شفتي زحمة علي بياع الجاتوه .. ماياكلوا جاتوه .. وال هو ياإما عيش ياماناكلش
بطلوا بطر بقي أحسن الجاتوه يغور من بطركم


الزبالة ... مالها أكوام الزبالة اللي في كل حتة دي حتي بقت معلم من معالم مصر يعني يرضيكي مثلاً اننا نهد أبو الهول عشان مشوه المنظر
ياعالم ياظلمة الزبالة بقت ذيها ذي ابو الهول السياح بييجوا مخصوص مصر عشان يصوروها ... كمان عاوزانا نحرمالسياح من الحاجة اللي بيحبوها


الزواج ... أحنا قلنا ميت مرة أن قاعدة الخزانة ولا جوازة الندامة
يخليكوا قاعدين أحسن .. جواز أيه بس اللي عاوزينه

الأسعار ...
أيه يعني لما كيلو اللحمة يبقي بأربعين جند بالصلاة علي النبي ... اللي مامعاهوش مايلزموش .. لازم يعني تحبكوها وتاكلوا لحمة .. طب يعني الحكومة تشحت عشان تأكلكم لحمة
اللي يعوزه البيت يحرم علي الجامع والحكومة وراها مصاريف يااااما
إشي مؤتمرات وإشي عربيات بالشيء الفلاني لزوم الفشخرة وإشي بدلات سفر للسادة الوزرة وإشي مصايف مخصوصة لسيادتهم
قطع لسان اللي يقول كلمة علي الحكومة
يعني عاوزين الحكومة تبطل فشخرة
وتصرف عليكم ياشحاتين
أمشي أنجر أنت وهو وشوفلك حكومة تانية
فوفو هانم بنت السلحدار باشا

واحد بيدور علي قلبه يقول...

أقلك ايه حلوه الاحلام بس تفتكري بقت احلامنا رغبف عيش وشغلانه وعروسه دي حتي الحاجت دي بقت اسهل من شكة الدبوس والدنيا حلوه والواحد متجوز اربعه والعيش بيجي لغاية باب البيت الرغيف ياكل اتنين يووووووووووه من صحاني من النوم ملحقتش اكمل الحلم .
شرفتني زيارتي ليكي.

رئـــــيسـة حزب الأحلام يقول...

السلام عليكم الى مدونات زوجة عاشقة انتى ماشاء الله خبيرة حلول

رئـــــيسـة حزب الأحلام يقول...

بحبها
والله الحل دة جميل بس الدقيق غالى ومافيش افران تخبز العيش

رئـــــيسـة حزب الأحلام يقول...

همس الحياة ازاى نبطل ناكل ونحلم ازاى لازم يبقى فيه غذاء عشان نحلم بضمير

رئـــــيسـة حزب الأحلام يقول...

حياتى قنبلة ذرية
ياحلال العقد

رئـــــيسـة حزب الأحلام يقول...

المفقوع مرارتها
وجهة نظر برضة

رئـــــيسـة حزب الأحلام يقول...

واحد بيدور على قلبة
دا انت اللى نورتن وخير اللهم اجعله خير

مروة الزارع يقول...

ياااااااااااا ة

ههههههههههههههههههه

جميل اوى ممكن انضم معاكم للحزب دة

رئـــــيسـة حزب الأحلام يقول...

السلام عليكم انت كدة انضميتى اوتامتيك اصل احنا عندنا كل حاجة توماتيكى

simple girl.. ..simple dream يقول...

حلوة اوى مشروع عروسة لكل مواطن

بعد كدة المفروض العرايس تنزل على بطاقة التموين فى الجمعية

هههههه

Whispers just for a Night يقول...

صدقتي سيدتي

فالحزب حزب أحلام
أسمحي لي باستمارة عضوية!

تقديري واحترامي

مجرد حكاية يقول...

يعني لو عل الأحلام ممكن نعتبرها بداية وخصوصا ان عندنا الحكومة شعارها اليومين دول""أحلام سعيدة يا شعب"" دا ما يمنعش اننا نحلم بكل الحاجات طالما لسا الأحلام معلهاش ضرايب الله أعلم يمكن يخصصو الأحلام هي كمان.....

حازم سويلم يقول...

هو فعلا الأحلام كانت هى الشئ الوحيد اللى محتاج حزب , وبالنسبة للمشكلات المظروحة للنقاش , حلها عند ربنا , واقترح ان يكون شعار الحزب
النوم فى مية البطيخ
تحياتى

سفير السلام يقول...

السلام عليكم
هذا أول مرور ليا في مدونتك الرائعه
وأتمنى قبل ماارد على أي شي تعطوني بطاقة عضويه في حزب الأحلام
أريد ترك حزب الحقيقة والكوابيس
شكرا ولن تكون هذه زيارتي الاخير
سلام

رئـــــيسـة حزب الأحلام يقول...

simple girl.. ..simple dream
السلام عليكم ياريت يعملوا كدة بس هينزلوا اية ولا اية فى بطاقة التموين

رئـــــيسـة حزب الأحلام يقول...

Whispers just for a Night
عضويتك وصلت ياباشا

رئـــــيسـة حزب الأحلام يقول...

مجرد حكاية
اشكرك على التعليق الجميل دة ودة قدرنا

رئـــــيسـة حزب الأحلام يقول...

سفير السلام اشكرك على زيارتك الغالية وعضويتك وصلت ياباشا