الأحد، 17 مايو 2009

أين الامان ؟


كل ماافتح التليقزيون الاقى القنوات الفضائية اتحولت لجريدة حوادث بالصوت والصورة هى فعلا حوادث بشعة وفعلا هم لازم ينبهونا ان مابقاش فيه امان بس كمية الاحساس اللى بتنتابنا بعد مشاهدة هذة الجرائم كفيلة بضياع الاحساس بالامان والاسوأ ان اغلب الجرائم داخل الاسرة المصرية يعنى الامان منعدم داخل الاسرة كمان وانا لست اخصائية اجتماعية ولكنى سأتكلم عن انطباعى الشخصى على هذة الجرائم اولا هتكلم موضوع التكلم عن الجريمة بكل تفاصيلها وخاصة لما صوروا واحد دبح واحد فى الشارع والناس واقفة تتفرج وكأنها بتتفرج على اى شئ اخر غير انسان وروح بتدبح بجد المشهد دة بشع جدا واحد بيدبح فى عز الضهر فى احدى شوارع اسكندرية والناس واقفة تتفرج والقاتل ماسك السكينة وسط الناس حاجة الصراحة بشعة خلانى اسأل هى للدرجة دى ماعدتش فى امان للدرجة دى بقت الروح رخيصة كدة للدرجة دى بقى القتل حاجة سهلة وغير طبعا حوادث الاغتصاب بجد ياريت الامان يرجع للشارع والاسرة المصرية

اللى بيحدث دة نتيجة ايه ؟ هو اكيد نتيجة لحاجات كتيرة متراكمة حاجات كتير غلط عايزة تتصلح

عشوائية" ثقافة غريبةعلينا "بطالة" تأخر سن الزواج "تربية وتعليم" اعلام

وحاجة نفسى اقلها ياريت والاعلام بيعرض الحوادث دى ياريت يقولنا الحلول هتكون ايه ؟
يعنى مش مجرد انهم يزودوا عدم احساسنا بالامان اللى مش موجود اصلا

هناك 7 تعليقات:

Dr.m يقول...

السلام عليكم

الامان
فعلا الحوادث والجرائم البشعه زادت جدا
والبلطجه اصبحت في كل مكان بشكل او باخر
وطبعا زي ما ذكرت الاسباب دى كلها ساعدت على كده
البطاله وتاخر الزواج وغياب الدين وغياب العقاب الرادع لامثال هؤلاء
ده غير المخدرات اللي غزت الشباب وحسبنا الله ونعم الوكيل
واعتقد ان الحل ليس بيد الافراد وانما بيد الدوله فلابد من الرقابه والعقاب وتوجيه دور الاعلام الذي له بالتاكيد يد فيما نعانيه

جعل الله بلدنا امنا امانا وسائر بلاد المسلمين
تحياتي
سلام

مامة مازن يقول...

السلام عليكم ورحمة الله وبركاته
موضوع من اخطر ما يكون كل يوم حاجة افظع من اللى قبلها ربنا يستر
خايفه على ما ولادى يبقو فى سن الشباب ان شاء الله يبقى الشوارع فيها حرب عصابات طب انا دلوقتى الى حد ما مطمئنة لانهم فى حضنى لسه كتاكيت امال لما يكبرو ان شاء الله واراد للدنيا استمرار هيكون الوضع ايه
ربنا يستر
تقبلى مرورى اختى وتحياتى واحترامى

الفراشة الصغيرة يقول...

ده كان زمااااااااااااان

لما تلاقى واحد بتخانق

واربعه بيحوشوا فيه

لكن دلوقتى واحد بيتعارك

التانى بيسخن فيه

عنف يا بنتى

احسن حاجة اهم منعوا القنوات الاباحيه

لانها بجد افسدت اشياء كثير ومبادىء كثير لدى كثير من الناس


تحياتى ليكى

جنّي يقول...

السلام عليكم

الامان موجود ولكنه موجه لشخص واحد هو الريس واسرته الكريمة والسادة قادة الحزب الفاسد وحكومة الحرامية ( رجال الاعمال ) والشعب يروح في ستين داهية .. ان لم يأتي الامن ممن منوط بهم حمايتنا فلن يأتي الامن مهما كانت الحلول والاقتراحات .. وميزانية وزارة الداخلية من اكبر ميزانيات الدولة .. فالله يزع بالسلطان ما لا يزع بالقرآن .. محتاجين التواجد الشرطي في الشارع المصري لمنع الجريمة وعسكري زمان بصفارته وسلاحه الميري ..

حسن حنفى يقول...

للاسف فعلا الحوادث بقت بتنتشر بطريقه فظيعه خصوصا مع سلبيه كل واحد يشوف حاجه ويقول انا مالي

مش اعتقد ان وسائل الاعلام تقدر تقدم اي حلول علشان كده بتكتفي بعرض المزيد والمزيد من المشاكل بدون حلول

الربان يقول...

تحياتي

العنف اصبح مسيطر علي حياتنا اليومية بشكل كبير....

فعلا " استرها يارب " علي وزن مدونتك الجميلة...استرها يارب مع الجميع.

لي موضوع عن العنف في مدونتي و يشرفني مشاركتك.

تحياتي و تقديري

هيثــم رمضـــان يقول...

العنف أصبح من سمات معظم الناس وزي ما إنتي قولتي الاسباب كتير وكلنا عرفنها غياب الوازع الديني, تدني مستوي الاخلاق ,إنهيار القيم,الجهل,الظروف الاقتصادية والاجتماعيةوتشمل الفقر والبطالة وتأخر سن الزواج. ولكن في سبب تاني مهم وهو عدم شعور الفرد بالعداله في كل شيء مما يؤدي إلي الاحباط والاستعداد للتصرف بعنف لتفريغ الغضب ولأتفه الاسباب يعني تلاقي قتل علشان 400 جنيه وواحد يدبح طفلين علشان 70 جنيه .
المهم الحل لازم يكون فيه مساواه وعداله يعني مش اللي ليه ضهر يعمل اللي هو عايزه واللي مالوش يتبهدل ويتهان. ولازم يكون فيه رادع قوي للعنف والبلطجه مش القاتل يقتل وهو لسه شايف جريمة قتل في اليوم اللي قبله!!لو القاتل يُقتل أمام الناس سيكون عبره لغيره .وقبل كده التربية في البيت والمدرسة والتوعية الدينية وزرع الاخلاق الحميده والقيم ونشر روح التسامح في المجتمع عن طريق خطبة الجمعة والبرامج التلفزيونية وكل وسائل الاعلام عموماً.معذره للاطالة